Inscríbite nel
nuesu boletín
Nós
ANTOXANA ye un proyectu concebíu como un espaciu d'alcuentru ente vecinos, creadores y visitantes alredor de la cultura.
Allúgase en Corao Castiellu, núcleu rural perteneciente al conceyu de Cangas de Onís (Asturies), nel entornu de Picos d'Europa.
El proyectu entama la so actividá pública en 2026 y ta impulsáu por Cañada de los Bojes, Sociedad de Beneficiu ya Interés Común, SL.
Programa
Gorka Postigo
Nunca conocerás a los mios nuevos amigos
20 Xun. → 13 Set. 2026
Martes a sábadu
11:00 - 14:00
Entrada llibre
Visites concertaes
De martes a sábadu, de 17:00 a 20:00 h, previa cita con al menos 3 díes d'antelación.
Seición Oficial
Esti proyectu naz a partir d'una esperiencia íntima de perda y tresformación y desendólcase como un percorríu visual que conecta dueldu, identidá y comunidá. Al traviés d'una serie de retratos realizaos en ciudaes como París, Londres, Río de Janeiro, Shanghái, Tokio y Abiyán, Gorka Postigo (Madrid, 1978) construye un mapa emocional onde les histories individuales dialoguen ente elles dende la vulnerabilidá, la resistencia y el deséu de conexón.
Lloñe d'una mirada documental tradicional, la esposición propón un espaciu d'alcuentru. Les imáxenes nun busquen definir identidaes, sinón abrir un llugar compartíu onde xestos, miraes y presencies xeneren nueves formes de relación. Nesti sentíu, el proyectu articúlase como una reflexón sobre la familia escoyida, la guapura queer y la posibilidá de reconstruyise fuera de los modelos heredaos. Tamién plantea una revisión crítica de les estructures de masculinidá, al tiempu que reivindica la fotografía como ferramienta pa crear comunidá.
Artista en residencia 2026
Fabiola Cedillo
20 Xun. → 15 Set. 2026
Martes a sábadu
11:00 - 14:00
Entrada llibre
Visites al taller
De martes a sábadu, de 17:00 a 20:00 h, previa cita con al menos 3 díes d'antelación.
Fabiola Cedillo (Ecuador) ye artista visual, fotógrafa documental y mediadora. Durante la última década desenvolvió una práutica que tresita ente la fotografía, la performance y la investigación artística. Los sos proyeutos abordaron temes como la teunoloxía y la reproducción humana, les adopciones internacionales illegales, les neurodivergencies y les trampes del capitalismu nes nueses vides vulnerables. Anguaño reside ente Ecuador y España. La so llegada al territoriu asturianu abre una nueva llinia d'investigación centrada na esperiencia d'habitar un paisaxe desconocíu dende una mirada trespasada pola memoria de los Andes, la Amazonía, la colonización y el mestizaje.
Durante la so residencia en Antoxana desenvolverá un ensayu fotográficu espandíu que parte d'una aproximación lenta al entornu de Corao. Al traviés de caminaes diaries, fotografía analóxica, autorretratu performativu y la recoleición de materiales naturales atopaos nel paisaxe, investigará cómo el territoriu puede dexar de ser un escenariu pa convertise nun interlocutor activu.
Espaciu
ANTOXANA desendólcase na Casa de Cueto, una casa solariega del sieglu XVIII catalogada pol so interés históricu-artísticu, allugada en Corao Castiellu, nel entornu de Picos d'Europa.
La rehabilitación, llevada a cabu por Xaime Diz y Susana Granizo del estudiu XDS, rescata l'edificiu del so estáu de ruina pa adautalu al so nuevu usu, contribuyendo asina a la puesta en valor del patrimoniu cultural d'Asturies.
La intervención combina técniques de l'arquiteutura vernácula y trabayos de restauración y conservación con actuaciones de factura contemporanea. Lo nuevu nun imita a lo antiguu, pero tampoco lu desplaza: lu acompaña y lu fai lexible conforme a los principios de la Carta de Venecia.
La obra executóse íntegramente por profesionales y artesanos llocales, priorizando materiales de proximidá y soluciones constructives de baxu impautu ambiental. La meyora de la envolvente térmica y la incorporación de sistemes d'alta eficiencia permiten amenorgar significativamente el consumu enerxéticu y la buelga de carbonu del edificiu.
ANTOXANA concíbese como un llugar d'alcuentru ente cultura, territoriu y comunidá, pero tamién ente memoria y presente. Dende esa voluntá, la intervención entiende la materialidá, la sostenibilidá y la flexibilidá programática como ferramientes pa prolongar la vida del edificiu ensin desdibuxar la so identidá.
Proyectu cofinanciáu pola Unión Europea al traviés del Fondu Européu Agrícola de Desendolcu Rural (FEADER), el Ministeriu d'Agricultura, Pesca y Alimentación y el Principáu d'Asturies, nel marcu de la Midida LEADER M19.2 del Programa de Desendolcu Rural 2014-2020.
LEADER
Desendolcu lideráu poles comunidaes llocales
